Gündogaryň beýik akyldary we nusgawy şahyry Magtymguly Pyragynyň doglan gününiň 300 ýyllygynyň bellenilýän ýylynda akyldar şahyrymyzyň arzuwlan ajaýyp zamanasyny, döwlet berkararlygyny, il agzybirligini joşgunly aýdym-sazlarymyz bilen wasp etmek has-da buýsançlydyr. Beýik Garaşsyzlygymyzyň 33 ýyllyk baýramynyň öňüsyrasynda şatlyk-şowhunly geçirilýän Türkmenistanyň Prezidentiniň “Türkmenistanyň Altyn asyry” baýragyny almak ugrundaky bäsleşigiň çäklerinde aýdym-saz bilen meşgullanýan ýaşlaryň arasynda geçirilen “Ýaňlan, Diýarym!” telebäsleşiginiň jemleýji tapgyry geçirildi. Bu bäsleşikde Türkmenistanyň Döwlet çeperçilik akademiýasynyň “Şekillendiriş sungaty” fakultetiniň “Heýkeltaraşlyk” kafedrasynyň 5-nji ýyl talyby Serdar Jumaýew işjeň gatnaşyp, Türkmenistanyň Prezidentiniň “Türkmenistanyň Altyn asyry” baýragynyň eýesi boldy. Ýaş talyp bu bäsleşige gatnaşmak bilen, özüniň zehin aýratynlygyny aýdym-saz sungatynda görkezmegi başardy. Onuň aýdym-saza bolan söýgüsi we yhlasy öňde goýan maksadyna ýetirdi.
