«Arkadag Serdarly bagtyýar ýaşlar» ýylyna bagyşlanan halkara sergi
2023-nji ýylyň dekabr aýynyň 27-ne paýtagtymyzyň Söwda-senagat edarasynda «Arkadag Serdarly bagtyýar ýaşlar» ýylyna bagyşlanan halkara ylmy - amaly maslahaty we köpugurly serginiň açylyş dabarasy geçirildi. Bu maslahat «Arkadag Serdarly bagtyýar ýaşlar ýyly» şygary astynda tamamlanyp barýan ýylyň jemlerini jemleýän özboluşly çärä öwrüldi. Bu çärä ýurdumyzyň dürli pudaklary gatnaşdylar. Türkmenistanyň Döwlet çeperçilik akademiýasy hem 2023-nji ýylda gazanylan üstünliklerini sergide açyp görkezdi. Sungat ojagynda bilim alýan talyplaryň taslama bäsleşiklerinde döreden taslamalary we sungatyň dürli görnüşlerine bagyşlanan kitaplar hem-de halkara internet olimpiadalarynda gazanan medallary döredijilik bilen meşgullanýan ýaşlaryň gazanan üstünlikleri buýsandyrýar. Sanly tehnologiýalaryň ösen döwründe özüniň döwrebaplygy bilen tapawutlanýan wirtual muzeý, 3D printerde öndürilen Arkadag şäherindäki “Akhan” binasyna bagyşlanan taslama sergä gelen tomaşaçylaryň ünsüni özüne çekdi. Baý many-mazmuna eýe bolan bu sergi asuda Diýarymyzyň ýagty geljegi bolan ýaşlaryň bagtyýar durmuşynyň altyn sahypasyna öwrüldi.
