Hyzmatdaşlyk etmek hakynda ähtnama gol çekildi
2023-nji ýylyň 30-njy oktýabrynda Türkmenistanyň Döwlet çeperçilik akademiýasynda Italiýa Respublikasynyň Frozinone şäheriniň şekillendiriş sungaty akademiýasynyň prezidenti Jorjio Bartolomuççiniň, Frozinone şäheriniň şekillendiriş sungaty akademiýasynyň sungaty öwreniş ylymlarynyň professory Alberto Anželo Dambruozonyň hem-de Italiýa Respublikasynyň Türkmenistandaky ilçisi Luiji Ferrariniň duşuşyk sapary boldy. Hormatly myhmanlar duz-çörek bilen dabaraly ýagdaýda garşy alyndy. Soňra Türkmenistanyň Döwlet çeperçilik akademiýasy bilen tanyşdyryldy. Sungat ojagynyň “Altyn fondy” muzeýinde sergilenen zehinli talyplaryň kämil sungat eserleri bilen içgin tanyşdyrylyp, ýokary okuw mekdebinde berilýän ähli hünärleriň alnyp barlyşy dogrusynda giňişleýin maglumat berildi. Duşuşygyň dowamynda Türkmenistanyň Döwlet çeperçilik akademiýasy bilen Italiýa Respublikasynyň Frozinone şäheriniň şekillendiriş sungaty akademiýasynyň arasynda hyzmatdaşlygy ösdürmek babatynda pikir alyşyldy we geljekki netijeli hyzmatdaşlygyň hukuk binýadyny döretmek maksady bilen ähtnama gol çekildi.
Geljekde Türkmenistanyň Döwlet çeperçilik akademiýasy hem-de Italiýa Respublikasynyň Frozinone şäheriniň şekillendiriş sungaty akademiýasy bilen binagärlik, dizaýn we şekillendiriş sungatynyň dürli ugurlarynda özara bähbitli hyzmatdaşlygy ösdüriler. 2023-nji ýylyň 31-nji oktýabrynda Türkmenistanyň Döwlet çeperçilik akademiýasynda hormatly Italiýaly myhmanlaryň gelmegi bilen bagly ýokary okuw mekdebimiziň halypa mugallymlarynyň hem-de talyp ýaşlarynyň gatnaşmagynda häzirki zaman şekillendiriş sungatyna bagyşlanan ylmy-amaly maslahaty geçirildi. Maslahatda Frozinone şäheriniň şekillendiriş sungaty akademiýasynyň sungaty öwreniş ylymlarynyň professory Alberto Anželo Dambruozonyň häzirki zaman şekillendiriş sungaty boýunça ylmy çykyşy hem-de (prezentasiýa) görkezildi. Şeýle-de, Türkmenistanyň Döwlet çeperçilik akademiýasynyň ylmy işler boýunça prorektory, sungaty öwreniş ylymlarynyň kandidaty Nurýagdy Ýagşymyradowyň türkmen şekillendiriş sungatynyň ösüş ýoluna bagyşlanan ylmy çykyşy we (prezentasiýa) görkezildi.
Italiýanyň sungaty dünýä şekillendiriş sungatynyň ösmegine saldamly goşant goşdy. Türkmenistanyň Döwlet çeperçilik akademiýasy bilen Italiýa Respublikasynyň Frozinone şäheriniň şekillendiriş sungaty akademiýasynyň arasynda özara hyzmatdaşlyk etmek hakyndaky ähtnama gol çekilmegi buýsandyryjy waka. Bu bolsa geljekde häzirki zaman şekillendiriş sungatyny ösdürmekde uly goşant goşjak ýaş zehinli sungat ussatlarynyň hünär kämilliginiň ýokarlanmagynda we medeni gatnaşyklaryň has-da berkemeginde döredilen mümkinçilikdir. Türkmen halkynyň Milli Lideri Gahryman Arkadagymyzyň we Arkadagly Gahryman Serdarymyzyň halklary ýakynlaşdyrýan medeniýeti we sungaty ösdürmekdäki alyp barýan parasatly döwlet syýasatynyň dost-doganlyk gatnaşyklaryny pugtalandyrýandygynyň subutnamasydyr.
Bilbil Çaryýewa,
Türkmenistanyň Döwlet çeperçilik
akademiýasynyň uly ylmy işgäri
