Dost-doganlyk medeni gatnaşyklary berkiden duşuşyk
Berkarar döwletiň täze eýýamynyň Galkynyşy döwründe halkara gatnaşyklaryň netijeli ösdürilmegine gönükdirilen mümkinçilikler türkmen medeniýetini, şekillendiriş we amaly-haşam sungatyny dünýä ýüzüne ýaýmaga gönükdirilen çäreler yzygiderli alnyp barylýar.
2023-nji ýylyň 18-nji oktýabrynda Russiýa Federasiýasynyň Tatarstan Respublikasynyň Medeniýet günleriň çäginde Türkmenistanyň Şekillendiriş sungaty muzeýinde “Halk çeperçilik kärleriň we senetleriň gorap saklanylyşy, galkynyşy we ösüşi” atly tema boýunça tegelek stol geçirildi. Bu medeni duşuşyga Tatarstan Respublikasynyň ýokary we ýörite orta mekdepleriniň wekilleri, senetçileri we halk ussatlary, suratkeşler, dizaýnerler we Türkmenistanyň Döwlet çeperçilik akademiýasynyň ylmy işler boýunça prorektory, sungaty öwreniş ylymlarynyň kandidaty Nurýagdy Ýagşymyradow we türkmen sungaty öwrenijileri jemgyýeti öwreniş ylymlary kafedrasynyň müdiri Jeren Baltaýewa, Türkmenistanyň Suratkeşler birleşiginiň agzasy Täjigül Gurbanowa, “Mähirli zenan” modalar öýüniň menejeri Jennet Bekiýewa gatnaşyp, häzirki döwürde türkmen we tatar amaly-haşam sungatynda milli däpleriň dowam edilişi we sanly tehnologiýalaryň önümçilikde giňden peýdalanylyşy barada çykyş edildi.
Muzeýde gurnalan sergide tatarlaryň halk senetleriniň özboluşlylygyna göz ýetirmäge ýardam edýän keçe, deri, dokma, zergärçilik we keşdeçilik sungatynyň önümleri we miniatýurasy, şeýle hem Türkmenistanyň Döwlet çeperçilik akademiýasynyň mugallymlaryň we talyplaryň zergärçilik, halyçylyk, külalçylyk eserleri, türkmen telekeçileriniň el işleri, el senetleri wasp edýän nakgaşlyk eserleri hem görkezilipdir.
Döredijilik duşuşyk geljekde Türkmenistanyň Döwlet çeperçilik akademiýasynyň ylym, bilim, medeniýet we sungat ugrundaky gatnaşyklarynyň berkemegine badalga berer.
Jeren Baltaýewa
Türkmenistanyň Döwlet çeperçilik akademiýasynyň
“Jemgyýeti öwreniş ylymlary” kafedrasynyň müdiri
