ABŞ-nyň “Medeni mirasy gorap saklamak baradaky Ilçiniň gaznasy” atly göni wideoaragatnaşyk arkaly duşuşyk geçirildi
2022-nji ýylyň 14-nji dekabrynda Amerikanyň Birleşen Ştatlarynyň Türkmenistandaky Ilçihanasynyň gurnamagynda ABŞ-nyň “Medeni mirasy gorap saklamak baradaky Ilçiniň gaznasy” (AFCP) maksatnamasy boýunça 2023-nji ýyl üçin nobatdaky taslamalar bäsleşigine gatnaşmagy teklip edilýän Türkmenistanyň degişli ministrlikleriniň we döwlet edaralarynyň wekilleri bilen göni wideoaragatnaşyk arkaly duşuşyk geçirildi. Bu duşuşyga Türkmenistanyň Döwlet çeperçilik akademiýasynyň mugallymlary hem-de talyplaryda gatnaşdylar. Duşuşykda şu ýyldan başlap teklip edilýän taslamalarda täze iki sany ugurlarynyň talaplary bilen tanyşdyryldy. Talaplaryň birinjisi, teklip edilýän taslamalarda jemgyýetiň gatnaşmagyny gazanmak, ikinjisi howanyň üýtgemeginde zeper ýetirip biljek zyýanynyň öňüni almak bilen bagly diýlip aýdyldy. Duşuşykda taslamalaryň möhletiniň 2023-nji ýylyň ýanwar aýynyň 4-ne çenli uzaldylýandygy gatnaşyjylaryň dykgatyna ýetirildi. Şeýle-de teklip ediljek taslamalary tabşyrmazdan ozal özara sorag-jogap arkaly pikir alyşmagyň mümkinçiliginiň bardygy aýdyldy. Taslamalar kabul edilenden soň bolsa goşmaça üýtgeşmeleri girizip bolmaýandygy giňişleýin düşündirildi. Ondan başga-da teklip edilýän taslamalaryň maddy däl taraplaryny göz öňünde tutmalydygy bellenildi. Bu duşuşyk Türkmenistanyň degişli ministrlikleriniň we döwlet edaralarynyň wekilleriniň sorag-jogaplary arkaly dowam etdi.
Bilbil Çaryýewa,
Türkmenistanyň Döwlet çeperçilik akademiýasynyň
Uly ylmy işgäri
