“Ýaşlar syýasaty – beýik geljegiň binýadydyr” atly maslahat geçirildi
Häzirki wagtda ýurdumyzda ýaşlaryň jemgyýetçilik syýasy işjeňligi barha ýokarlanýar. Döwletimiziň ýaşlar barada alyp barýan döwlet syýasaty Türkmenistanyň Prezidenti Serdar Berdimuhamedowyň Türkmenistanyň Magtymguly adyndaky Ýaşlar guramasynyň VII gurultaýyndaky çykyşynda aýdyň beýan edildi. Arkadagly Serdarymyzyň belleýşi ýaly, ýurtda amala aşyrylýan ýaşlar syýasatynyň hukuk binýadyny pugtalandyrmak, ýaşlaryň köpugurly mümkinçiliklerini doly amal etmegine ýardam edýän mümkinçilikleri giňeltmek maksady bilen “Ýaşlar barada döwlet syýasaty hakynda” Türkmenistanyň Kanunynyň rejelenen görnüşi işlenilip taýýarlanyldy.
2022-nji “Halkyň Arkadagly zamanasy” ýylynyň şanly Garaşsyzlygymyzyň öňüsyrasynda, ýagny 23-nji sentýabrynda naýbaşy sungat eserleri bilen tanalýan Türkmenistanyň Döwlet çeperçilik akademiýasynyň mejlisler jaýynda “Ýaşlar syýasaty – beýik geljegiň binýadydyr” atly maslahat geçirildi. Bu maslahata çeperçilik akademiýasynyň halypa mugallymlary we talyp- ýaşlary gatnaşdylar. Maslahatda çykyş edenler ýurdumyzda ýaşalaryň ylymly-bilimli bolmaklaryny, sungata bolan ukyplaryny, ýaş nesliň sporta bolan höweslerini has-da artdyrmakda alnyp barylýan işler barada giňişleýin bellenilip geçildi. Bu bolsa ýaş nesli beden hem ruhy taýdan sagdyn terbiýelemäge uly itergi berýär. Ýeri gelende aýtsak, Türkmenistanyň Döwlet çeperçilik akademiýasynyň talyplary hem Watana bolan söýgülerini özleriniň döredijilikli sungat eserlerinde açyk we aýdyň ýerine ýetirýärler.
Annaseýidowa Gülşat
“Amaly-haşam sungaty” fakultetiniň
“Sungaty öwreniş” kafedrasynyň 3-nji ýyl talyby
