2022-nji «Halkyň Arkadagly zamanasy» ýylynyň 26-njy fewralynda Türkmenistanyň Döwlet çeperçilik akademiýasynda bir günde dünýä inen Zaman atly taýçanaga hem-de Eýýam atly alabaýa bagyşlanyp sergi gurnaldy. Bu serginiň çäginde tegelek stoluň başynda söhbetdeşlik hem taýýarlanyldy. Söhbetdeşlikde çeperçilik akademiýasynyň «Nakgaşçylyk» kafedrasynyň uly mugallymy P.Garryýewiň, «Sungaty öwreniş» kafedrasynyň uly mugallymy A.Alihanowyň, J.Baltaýewanyň, «Binagärlik» kafedrasynyň mugallymy G.Goçmyradowanyň gatnaşmaklarynda çykyşlar ýerine ýetirildi. Tegelek stoluň başynda alnyp barylan gepleşigiň baş maksady hormatly Prezidentimiziň 2022-nji ýylyň 23-nji fewralynda Ahalteke atçylyk toplumyna gelip, ol ýerde behişdi bedewler bilen didarlaşyp, edebi döredijilik bilen meşgullanyp, dünýä nusgalyk milli gymmatlyklarymyza uly hormat goýmagynyň aýdyň beýany hökmünde bolup durýanlygy bilen baglanyşyklydyr. Tegelek stolda çykyş eden mugallymlar hormatly Prezidentimiziň behişdi bedewlerimiziň göwnejaý ideg edilmegi bilen yzygiderli gyzyklanyp we ýurdumyzda seýisçilik sungatyny ösdürmekde toplumlaýyn işleriň ýokary derejede alnyp barylýandygy bilen bagly gürrüňler beýan edildi. Mälim bolşy ýaly ýylyň başynda täze dünýä inen taýçanaga hormatly Prezidentimiz Zaman diýip at dakypdy. Halkara «Türkmen alabaý itleri» assosiasiýasynyň agzalary tarapyndan Zaman atly taýçanak bilen bir günde dünýä inen alabaýa at dakyp bermegi haýyş edilip, «Berkarar döwletiň täze eýýamynyň Galkynyşy» diýen şygaryň hormatyna täze dünýä inen alabaýa Eýýam diýip at goýulmagy, munuň özi Watanymyzyň täze eýýamynyň batly gadamlarynyň belent nyşanynyň alamaty hökmünde dabaralanmasynyň subutnamasydyr diýip çykyş edenler bellediler.
Hormatly Prezidentimiz Gurbanguly Berdimuhamedowyň türkmen sungatynda döredip berýän mümkinçilikleri esasynda şekillendiriş sungatynyň ähli ugurlarynda behişdi bedewlerimiziň hem-de türkmen alabaýlarynyň keşbini täze öwüşgin bilen şekillendirip, halkymyza ýetirmekde döredijilikli işleriň ýokary derejede alnyp barylýandygy bilen bagly gürrüňler tegelek stoluň başynda giňişleýin beýan edildi.
Bilbil Çaryýewa,
Türkmenistanyň Döwlet çeperçilik akademiýasynyň
uly ylmy işgäri
