Millilik – nesil terbiýesiniň özeni
2022-nji ýylyň ýanwar aýynyň 24-ine Türkmenistanyň Döwlet çeperçilik akademiýasynyň uly mejlisler zalynda Türkmenistanyň Demokratik partiýasynyň, Türkmenistanyň Agrar partiýasynyň Merkezi Geňeşiniň, Türkmenistanyň Senagatçylar we telekeçiler partiýasynyň, Türkmenistanyň Döwlet Medeniýet Merkeziniň kärdeşler arkalaşygy guramasynyň, Türkmenistanyň Magtymguly adyndaky Ýaşlar guramasynyň wekilleriniň gatnaşmagynda, Ýaşlaryň ähli taraplaýyn ösen, beden we ruhy taýdan sagdyn, bilimli-ylymly bolmagyny gazanmak, ýaşlarda ata-babalarymyzyň müňýyllyklaryň dowamynda kemala getiren mertlik, edermenlik, watansöýüjilik, halallyk, ruhybelentlik, päkýüreklilik, arassa ahlaklylyk, zähmetsöýerlik ýaly häsiýetleri terbiýelemek, hem-de olarda milli mirasymyza bolan sarpany kemala getirmek maksady bilen ýaşlaryň arasynda «Millilik – nesil terbiýesiniň özeni» atly şygar bilen wagyz-nesihat çäresi geçirildi.
Wagyz-nesihat çäresinde çykyş edenler hormatly Prezidentimiziň ýolbaşçylygynda berkarar döwletimiziň bagtyýarlyk döwründe ýaşlary terbiýelemek, olary milli ruhda kemala getirmek babatda alnyp barylýan tutumly işleriniň ähmiýeti dogrusynda aýdyldy. Edep-terbiýe halkyň ýaşaýyş durmuşy bilen ösýär, taryhyň uzak ýolunda kämilleşýär, adamzadyň aňynda orun alýar. Şeýlelikde, nesilme-nesil dowam edýän mizemez ýörelgelere öwrülýär. Ata-watanyny eý gören ata-babalarymyz şu günki hem geljekki nesillere halallyk ýoluny, edep terbiýäni gymmatly miras galdyrypdyrlar. Pederlerimiziň dowam edip gelýän asyllylyk, halallyk, dogduk mekanymyza, mähriban halkymyza, agzybirlik ýolumyza wepalylyk, zähmetsöýerlilik ýaly, ajaýyp ýörelgeleri ýaşlaryň aňyna guýmak döwrümiziň esasy wezipeleriniň biridir diýip, çykyş edenler buýsançly bellediler.
Ondan başga-da, türkmen edebiýaty türkmen halkynyň edep-kadalaryny nesilden-nesillere geçirmegiň kämil mekdebidigini we ýaşlary milli ruhda terbilelemek işinde halk döredijilik eserlerimiziň şadessanlaryň ähmiýetiniň örän uludygy beýan edildi. Edep mirasymyzda watansöýüjilik, halallyk, ynsanperwerlik, myhmansöýerlik, edermenlik, zähmetsöýerlik ýaly ruhy dünýämiziň iň naýbaşy gymmatlyklary jemlenendir. Ata-enäni sylamak perzende parzdyr. Ýaşuly neslini sylamak, kiçä hormat goýmak türkmen halkynyň asylly däpleriniň biridir diýlip nygtaldy. Şeýle-de, bagtyýarlyk döwrümiziň pähim-paýhasly ýaşulullarymyz, ak saçly enelerimiz biziň guwanjymyzdyr. Her bir bagtyýar türkmen maşgalasy öz mukaddes ojagynyň ýylylygyny duýup ýaşaýar. Öz perzentleriniň aňyna watan mukaddesligini guýmak üçin mährem enelerimiz ajaýyp hüwdülerinde beýan edýärler diýip bellenildi.
Türkmen halkynyň taryhynyň dowamynda döreden edebi hem-de medeni mirasynda milletiň tutuş ahlak ýörelgelerinde durmuş tejribesi jemlenendir. Edebi hem-de medeni gymmatlyklar her bir halkyň döredijilik dünýäsiniň asyrlaryň synagyndan geçen kämillik nusgasydyr. Şeýle gymmatlyklary öwrenmek we goramak milletiň medeniýetiniň dünýä medeniýetindäki ornuna baha bermekde ähmiýeti uludyr.
Wagyz-nesihat çäresiniň ahyrynda oňa gatnaşyjylar ýaşlaryň saglygy, halkynyň bagtyýarlygy üçin gije-gündiz alada edýän Milli Liderimiziň adyna hoşallyk sözlerini aýdyp, alyp barýan il-ýurt bähbitli, döwlet ähmiýetli işleri üçin hormatly Prezidentimize jan saglyk, işlerinde rowaçlyk arzuw etdiler.
Bilbil Çaryýewa,
Türkmenistanyň Döwlet çeperçilik akademiýasynyň
uly ylmy işgäri
