Däbe öwrülen bäsleşik
Berkarar döwletimiziň bagtyýarlyk döwrüniň 2021-nji «Türkmenistan – parahatçylygyň we ynanyşmagyň Watany» ýylynda hormatly Prezidentimiziň alyp barýan döwlet syýasatynyň netijesinde ýurdumyzda ylym we bilim, medeniýet we sungat dabaralanýar. Gahryman Arkadagymyzyň paýhasly taglymatlaryna eýerip Türkmenistanyň Döwlet çeperçilik akademiýasynda talyplar sungatyň birnäçe ugurlary boýunça hünär alýarlar. Ýaşlar sapaklardan boş wagtlary özleriniň erkin döredijilikleri bilen meşgul bolýarlar. Öz gezeginde çeperçilik akademiýamyzda bilim berýän mugallymlar hem ajaýyp sungat eserlerini döredýärler. Umuman, biziň ýokary okuw mekdebimizde sungat bilen meşgullanmak üçin çäksiz mümkinçilikler döredilen. Bu mümkinçiliklerden peýdalanyp biziň ýokary okuw mekdebimizde Türkmenistanyň Bilim ministrligi tarapyndan taýýarlanan düzgünnama laýyklykda «Aýyň fakulteti», «Aýyň kafedrasy», «Aýyň mugallymy», «Aýyň talyby» ýaly bilim bahalandyryş bäsleşikleri geçirmek asylly däbe öwrüldi. 2021-nji ýylyň dekabr aýynda hem ýokary okuw mekdebimiziň mugallymlary we talyp ýaşlary özleriniň ýokary netijelerini görkezdiler. Ýagny, dekabr aýynda «Grafika» kafedrasynyň mugallymy Rahman Rahmanow «Aýyň mugallymy» adyna mynasyp boldy. Ol açyk okuw sapaklaryny ýola goýmakda, kitap grafikasy boýunça özüniň döreden eserlerini halka ýetirmekde, teleýaýlymlarda çykyşlary ýerine ýetirmekde alyp baran işleriniň netijeleri boýunça ýokary ballary gazandy. «Aýyň talyby» adyna «Binagärlik» kafedrasynyň 5-nji ýyl göreldeli talyby Baýramgeldi Ataýew mynasyp boldy. «Aýyň kafedrasy» adyna bolsa «Sungaty öwreniş» kafedrasy mynasyp boldy. Kafedranyň ýeňiji bolmagyna sungaty öwreniji mugallymlaryň we talyplaryň ýerine ýetiren köp sanly döredijilik we mahabat işleri, makalalary üstünlik getirdi.
Bäsleşikde ýeňiji bolan mugallymlar we talyplar hormat hatlary bilen sylaglandylar. Olar özleriniň ýürek buýsançlarynda mundan beýläk-de özleriniň batlaryny gowşatman, täze-täze eserleri yzygiderli döredip Watanymyzyň sungatyna mynasyp goşant goşjakdyklaryna ynandyrdylar.
Gülşat Annaseýidowa,
Türkmenistanyň Döwlet çeperçilik akademiýasynyň
«Sungaty öwreniş» kafedrasynyň 2-nji ýyl talyby
