Talyp ýaşlar bilen geçirilen wagyz-nesihat çäresi
2021-nji ýylyň noýabr aýynyň 8-ne Türkmenistanyň Döwlet çeperçilik akademiýasynyň uly mejlisler zalynda Türkmenistanyň Içeri işler ministrliginiň polisiýanyň ýol gözegçiligi müdirliginiň, Türkmenistanyň Içeri işler ministrliginiň jenaýat agtaryş müdirliginiň, Talyplar saglyk öýüniň lukmanynyň, Türkmenistanyň Döwlet medeniýet merkeziniň kärdeşler arkalaşygy guramasynyň wekilleriniň gatnaşmagynda, çeperçilik akademiýanyň okuw işleri boýunça prorektory Rüstem Annamuhammedowyň alyp barmagynda, talyp ýaşlaryň arasynda sagdyn durmuş we milli ahlak ýörelgelerini ýaýbaňlandyrmak, ýol hereketiniň howpsuzlygyny berjaý etmek, kanunbozulmalaryň öňüni almak barada wagyz-nesihat çäresi geçirildi.
Wagyz-nesihat çäresinde çykyş edenler hormatly Prezidentimiziň ýolbaşçylygynda ýurdumyzda halkymyzyň gowy ýaşamagy üçin oňyn şertleriň döredilýändigini buýsanç bilen bellediler. Berkarar döwletimiziň bagtyýarlyk döwründe ýaşlary terbiýelemek, olary milli ruhda kemala getirmek babatda alnyp barylýan tutumly işleriniň ähmiýeti dogrusynda bellemek bilen, ýurdumyzda köçe-ýol hereketininiň düzgünlerini pugta berjaý etmek bu biziň ömrümiziň rahatlygydyr diýip aýdyp geçdiler. Herekete gatnaşyjylar hökmünde pyýadalar üçin niýetlenen ýörite geçelgelerden, ýagny ýerasty we ýerüsti geçelgelerden geçmekligi barada aýratyn nygtaldy. Ýol hereketiniň düzgünlerini talabalaýyk berjaý etmeklik, daş-töweregimiziň abadançylygyny şertlendirýär diýip bellenildi we dürli hukuk bozulmalaryň öňüni almak boýunça yzygiderli geçirilýän işler barada belläp geçdiler.
Ondan başga-da, talyp ýaşlara sagdyn durmuş ýörelgelerine eýerip ýaşamak, dogry iýmitlenmek, keselleriň ýaýramagynyň öňüni almak, agyz-burun örtükleriniň bellenen kada laýyklykda dakynylmagy, jemgyýetçilik ýerlerinde bellenen aralygyň saklanylmagy, şahsy we jemgyýetçilik gigiýenasynyň düzgünleriniň berk berjaý edilmegi ündeldi. Şeýle-de ata-ene mukaddesligi, maşgala mukaddesligi, arassa ahlaklylyk barada aýtdylar.
Wagyz-nesihat çäresiniň ahyrynda oňa gatnaşyjylar ýaşlaryň saglygy, halkynyň bagtyýarlygy üçin gije-gündiz alada edýän Milli Liderimiziň adyna hoşallyk sözlerini aýdyp, alyp barýan il-ýurt bähbitli, döwlet ähmiýetli işleri üçin hormatly Prezidentimize jan saglyk, işlerinde rowaçlyk arzuw etdiler.
Bilbil Çaryýewa,
Türkmenistanyň Döwlet çeperçilik akademiýasynyň
uly ylmy işgäri
