Page 13 - Gujurly 2017

jemgyýetçilik binalarynyň içki bezeginiň görnüşini görkezipdirler. Ata Mohammad
Ahmed häzirki zaman tehnologiýalaryny peýdalanyp, 3D ölçegindäki elektrik lampany
ýerine ýetiren bolsa, Döwletmämmet Nyýaztuwakow küşt görnüşindäki açylyp-
ýygnalýan mebeliň nusgasyny döredipdir. Ony diwaryň bezegi we oturgyçly stol
hökmünde hem peýdalanyp bolýar. Meret Meredow «Beýik Ýüpek ýoly» atly dizaýn
taslamasyny tebigy adaçdan döredip, onda güberçekli görnüşindäki düýe kerweni
we Beýik Ýüpek ýolunyň ugrunda ýerleşen Türkmenistanyň ýadygärlikleriň maketlerini
goýupdyr. Dizaýn taýdan çemeleşme we türkmen nagyşlary görnüşindäki dürli
utgaşmalar Ogulşirin Rejepowanyň «Tans sporty», Jeýran Umarowanyň «Milli äheňleri»,
Aýbölek Babajanowanyň «Narlar» we Jeren Babaýewanyň «Milli natýurmort» ýaly
eserlerinde öz beýanyny tapypdyr.
Sport üstünlikleriniň şahyranalygy diňe bir nakgaşlyk we heýkel eserlerinde
öz beýanyny tapman, eýsem amaly-haşam sungatynyň eserlerinde giňden
şekillendirilýär. Mähri Annamyradowanyň «Tizlik», Gülşat Ýollyýewanyň «Küştçiler»,
Jeren Rahmanberdiýewanyň «Atly ýöriş», Zübeýda Sytdyhowanyň «Sport» ýaly
gobelenlerinde, Begenç Amanowyň «Küşt», Hemra Taganowyň «Basketbol» zergärçilik
önümlerinde, Ahmetguly Annageldiýewiň, Atamyrat Döwletowyň keramikasynda
häzirki zaman haşam dili we türkmen halk sungatynyň çeper däpleri sazlaşykly
peýdalanypdyr.
Türkmen halk döredijiligi Gurbangül Esengulyýewa («Küştdepdi» haşam güldany),
Käkilik Hezretgulyýewa («Bäş welaýatynyň folklýor topary» kiçi heýkeltaraşlygy) üçin
ylham çeşmesi bolup hyzmat edipdir. Gülşirin Hydyrowanyň nepislik bilen dokalan
«Miras» atly haly eseriniň kompozisiýasy Türkmenistanyň orta asyr arhitekturasyndaky
«girih» nagşyny ýatladýar. Nakgaşlygyň we grafikanyň çeper usullarynyň ussatlyk bilen
peýdalanylyşyny gönüburçly syrçaly plitkalardan düzülen Döwletgeldi Gurtmyradowyň
«Beýik Ýüpek ýoly» atly keramika pannosynda görmek bolýar. Bu çözgüt her bir
tomaşaça Garagumdan geçýän kerweniň pursatyny göz öňüne getirmäge ýardam
berýär.
Sergide Sungaty öwreniş kafedrasynyň talyplary dünýä we türkmen şekillendiriş
sungatynyň taryhyna bagyşlanan kataloglaryň we kitaplaryň maketlerini görkezdiler.
Işleriň köpüsinde ilkinji gezek Garaşsyz, baky Bitarap Türkmenistanyň häzirki zaman
suratkeşleriniň döredijilik eserlerinde sungaty öwrenijilik derňewleri beýan edilip, şeýle
hem muzeýlerde we şahsy ýygyndylarynda saklanylýan işleriň fotosuratlary ýerleşdirilen.
Ýaş sungaty öwrenijiler özlerini ussat dizaýnerler hökmünde görkezip, berlen temany
açmakda özboluşly çözgütleri tapypdyrlar.
«Gujurlý ýaşlar» döredijilik toparynyň sergisi – ýaş we zehinli suratkeşleriň hem-de
sungaty öwrenijileriň sagdyn durmuş ýörelgesiniň wagyz-nesihat etmegiň, milli däp-
dessurlaryna hormat goýmagyň we berkarar döwletimiziň bagtyýarlyk döwründe
häzirki zaman Türkmenistanyň özgerýändiginiň we öňe gidýändiginiň aýdyň mysalydyr.

Jeren Baltaýewa,
Türkmenistanyň Döwlet çeperçilik akademiýasynyň
Sungaty öwreniş kafedrasynyň mugallymy

13