Page 24 - Gujurly 2017

GUJURLY GOLLAR

Berkarar döwletimiziň bagtyýarlyk döwri çeperçilik sungatynyň ösüşine we many-
mazmunyna öz oňaýly täsirini ýetirdi. Çeperçilik sungatynyň ussatlarynyň, bu hünäri ele
alýan talyp ýaşlaryň döredijilik işine berilýän üns artdy.
15-nji dekabrda Türkmenistanyň Döwlet çeperçilik akademiýasynyň sergiler
jaýynda zehinli talyplaryň eserlerinden düzülen “Gujurly ýaşlar” atly sergi geçirildi. Her ýyl
geçirilmegi däbe öwrülen bu sergide talyp ýaşlar bu gezek hem aýratyn yhlas siňdirip
döreden we halypalaryň synyndan geçen dürli nakgaşçylyk we beýleki çeperçilik
tärlerinde ýerine ýetiren işlerini görkezdiler.
Sergide Tükmenistanyň Döwlet çeperçilik akademiýasynyň talyby Toýly
Çopanowyň işleri tomaşaçylaryň gyzyklanmalaryna mynasyp boldy. Häzire çenli ýerine
ýetiren işleriniň aglaba böleginiň çeper eserler esasynda döredilen eserlerdigi ýaş
suratkeşiň sungat ýolunda ilkinji ädimlerinden göze ilýän aýratynlygydyr. Şeýle işleriň biri
“Syrly göçüm” diýlip atlandyrylypdyr. Toýly bu eserini ýazyjy Atajan Taganyň “Saragt
galasy” atly romany esasynda döredipdir.
Eserde romanda gürrüňi edilýän döwrüň öňe çykaran şahsyýetleriniň küşt
tagtasynyň başynda oturan pursatlary şekillendirilipdir. Küşt oýnaýanlaryň we olaryň
ýanyndaky beýleki adamlaryň bar ünsi oýunda indiki ediljek göçüme gönügipdir. Küşt
tagtasynda oýnuň üçünji tapgyrynyň gyzgalaňly pursady janlandyrylýar.
Küşt oýny iň gadymy oýunlaryňbiri. Taryhy çeşmeleriň berýän maglumatlaryna görä,
ilkinji türkmen küştçüsi Muhammet As-Sulydyr. Ýaş nakgaşyň işine syn edip, küştüň XIX
asyr türkmen durmuşynda hem meşhur bolandygyna göz ýetirmek bolýar. Küşt diňe bir
oýun däl-de, durmuş, ugurtapyjylyk, sport, ylym we sungat hasap edilýär.
“Syrly göçüm” atly nakgaşçylyk işiniň ýaşlarda logiki pikirlenmek ukybyny
ösdürmekde, olarda küşt oýnuna söýgi döretmekde ähmiýeti uly bolar diýip aýtmak
bolar. Şunuň bilen bir hatarda ýaş nakgaşyň reňkleri ulanmak babatda ezberligi, şeýle
hem wakalaryň jümmüşinde görkezilýän pursatlaryň daş-töwerek bilen baglanyşygyny
tapmakdaky özboluşly çemeleşmeleri üns berilmegine mynasypdyr. Gündogar
binagärçiligini we Horezmiň neçjarçylyk sungatyny görkezýän köşki-eýwanyň içki
görnüşi (interýeri) wakalaryň bolup geçýän döwrüni,zamanasyny göz öňüne getirmäge
mümkinçilik berýär.
“Gujurly ýaşlar” atly döredijilik sergisi Türkmenistanyň Döwlet çeperçilik
akademiýasynyň talyp ýaşlarynyň ajaýyp döwrümiziň ösüşlerini, sagdynlygy,
ruhubelentligi, medeni mirasymyzy, edebiýatymyzy wasp etmek babatda gazanýan
kämillik derejesini giňden açyp görkezýän möhüm çäredir. Biz – ýaşlaryň hünär eýesi
bolup, ýurdumyzyň ösüşlerine mynasyp goşandymyzy goşmagymyza giň mümkinçilikleri
döredip berýän mähriban Arkadagymyzyň jany sag,il-ýurt bähbitli işleri hemişe rowaç
bolsun!
Azatgül Gulowa
Türkmenistanyň Döwlet çeperçilik akademiýasynyň
Sungaty öwreniş kafedrasynyň 5-nji ýyl talyby.
Watan 2017-nji ýylyň
16-njy dekabry

24