Page 22 - Gujurly 2018

Berkarar döwletimiziň bagtyýarlyk döwründe Hormatly
Prezidentimiziň taýsyz tagallasy bilen türkmen ýaşlarynyň bilimli-
ylymly bolup ýetişmekleri üçin uly işler alnyp barylýar. Türkmenistanyň
Döwlet çeperçilik akademiýasy hem bilim, medeniýet we sungat
ojagynyň biri bolup, bu ýokary okuw mekdebinde talyp ýaşlar
özleriniň şekillendiriş sungatyndaky başarnyklaryny uly höwes bilen
artdyrýarlar. Muňa mysal edip, 2018-nji ýylyň dekabr aýynyň 15-ne
Türkmenistanyň Döwlet çeperçilik akademiýasynyň sergiler jaýynda
“Gujurly ýaşlar” atly toparynyň nobatdaky döredijilik sergisiniň
açylmagyny bellemek zerurdyr. Bu sergä öz döredijilik eserleri bilen
gatnaşýan zehinli talyplaryň sany her ýylda artýar. 2018-nji ýylda
ikiýüzden gowrak talyplar özleriniň dürli temalarda ýerine ýetiren
sungat eserlerini sergilediler. Olaryň arasynda “Nakgaşçylyk we
taslama” kafedrasyndan jemi elli ýedi sany talyp nakgaş eserleri
bilen gatnaşdylar. Bu ýerde şekillendiriş sungatynyň miniatýura
nakgaşçylygy, stanok nakgaşçylygy, monumental nakgaşçylyk,
teatr-haşam nakgaşçylygy boýunça ýerine ýetirilen erkin döredijilik
işlerini synlamak bolýar. Gujurly ýaşlar eserlerinde taryhy wakalary,
belli şahsyýetleriň keşplerini, milli däp-dessurlarymyzy we medeni
mirasymyzy, gözel tebigatymyzy, ahal-teke bedewlerimizi, şeýle-de,
bagtyýarlyk döwrümizi açyp görkezýän, türkmen halk durmuşynyň
gaýtalanmajak gözel pursatlaryny beýan edýärler. Zakirjan
Babaýewyň “Gündogar hazynasy” atly eserinde italýan syýahatçysy
Marko Polonyň türkmen halysynyň gözelligine haýran galyp, ony eline
alyp synlap duran pursady görkezilýär. Muhammet Gubyýewiň, Toýly
Çopanowyň eserlerinde bolsa gündogar alymlarynyň taryhyndan bir
parçalar şekillendirilýär. Sergilenen eserleriň esasy özenini Beýik
ýüpek ýolunyň ugry boýunça geçirilen “Amul-Hazar 2018” atly halkara
awtoralli ýaryşynyň beýany tutýar. Talyplar güneşli sähramyzda
awtoulaglaryň Amul badalgasyndan gaýdyp, Hazaryň pellehanasyna
tarap barýan awtoralli ýaryşynyň gyzykly pursatlaryny şekillendirdiler.
Bu taryhy waka esasan Bagtyýar Begsähedowyň işlerinde görkezilýär.
Ýokary okuw jaýymyzyň gujurly ýaşlarynyň zehinlerini
artdyrmakda zähmet çekýän halypa mugallymlaryň baş maksady
talyplary özbaşdak döredijilik ýoluna gönükdirip, ýokary derejeli
hünärmenleri taýýarlamakdyr. Şu maksat bilen “Nakgaşçylyk we
taslama” kafedrasynyň talyplaryna halypalyk eden Annadurdy
Almamedow, Aşyrmuhammet Kulyýew, Babageldi Owganow,
Gylyçmyrat Nurlyýew, Berdimyrat Toýçyýew, Atageldi Serdarow,
Baýram Nuryýew, Annageldi Jumaniýazow, Wepa Gurdow, Anna
Annaýew, Kakageldi Gurbangeldiýew, Begenç Berkeliýew, Azat
Myradow, Batyr Bekmyradow ýaly mugallymlar taýsyz işleri bitirdiler.
“Gujurly ýaşlar” sergisine talyplar giň mazmunly, uly göwrümli
eserleri bilen gatnaşdylar. Olaryň gazanan üstünlikleri bolsa, halypa
mugallymlaryň irginsiz zähmetiniň netijesidir.