Berkarar döwletimiziň bagtyýarlyk döwründe Gahryman Arkadagymyzyň taýsyz tagallalary netijesinde ýurdumyzda beýleki ulgamlar bilen bir hatarda türkmen sungatyny ösdürmekde, kämilleşdirmekde we ony dünýä tanatmakda uly işler alnyp barylýar. Hormatly Prezidentimiziň tagallasy bilen häzirki döwürde ýaş suratkeşlerimiziň döredijiliginiň kämilleşmegine uly mümkinçilik döredilýär. Muňa Türkmenistanyň Döwlet çeperçilik akademiýasynda asylly däbe öwrülip geçirilýän «Gujurly ýaşlar», «Sport» we köpsanly döredijilik aýratynlyklary açyp görkezýän temalaýyn we şahsy sergiler aýdyň mysaldyr. Geçirilýän sergilerde ýaş suratkeşleriň ýadawsyz zähmeti we açyk zehini şekillendiriş sungatynyň ähli görnüşlerinde: nakgaşçylyk, grafika, heýkeltaraşlyk, dizaýn taslamalarynda hem-de amaly-haşam sungaty we sungaty öwreniş işlerinde beýan edilýär.
2022-nji ýylyň 23-nji fewralynda Türkmenistanyň Bilim ministrliginiň, Türkmenistanyň Sport we ýaşlar syýasaty ministrliginiň hem-de Türkmenistanyň Bilim ministrliginiň «Türkmenistan» Ýaşlar bedenterbiýe-sport guramasynyň alyp barmagynda «Sport sagdynlygyň gözbaşy» atly tegelek stoluň başyndaky söhbetdeşlik guraldy. Şeýle hem bu söhbetdeşlik bilen bilelikde talyplaryň sport temasyna bagyşlap döreden birnäçe wagyz-ündew beriji eserleriniň sergisi hem ýokary guramaçylykly gurnaldy.
Berkarar döwletimiziň bagtyýarlyk döwründe sport täze jemgyýetiň aňyýetinde we täze nesli terbiýelemekde iň wajyp orunlaryň birini eýeleýär. Talyp ýaşlara okamaga, ylym bilen meşgullanmaga döredip berýän ähli mümkinçilikleri üçin Mähriban Arkadagymyza çäksiz buýsanjymyzy bildirýäris. Hormatly Prezidentimiziň janynyň sag, ömrýniň uzak bolmagyny arzuw edýäris!
Gülşat Annaseýidowa,
Türkmenistanyň Döwlet çeperçilik akademiýasynyň
«Sungaty öwreniş» kafedrasynyň 2-nji ýyl talyby
